التسويق عبر محركات البحث أو SEO مش مجرد إنك تختار شوية كلمات مفتاحية وتحاول تجيب ترافيك لموقعك وخلاص. لو مشيت بالطريقة دي، ممكن تجيب زيارات كتير لكن بدون أي قيمة حقيقية، لأن الزائر مش مهتم فعلًا بخدمتك أو مش في المرحلة المناسبة لاتخاذ قرار الشراء.

هنا بقى بييجي دور الـ Sales Funnel أو الـ Customer Journey، واللي هي رحلة العميل من بداية معرفته بالبراند بتاعك لحد ما ياخد قرار الشراء. ولو مشيت معاه في كل خطوة وقدمت له المحتوى المناسب في الوقت الصح، هتضمن إنه يتفاعل معاك بشكل إيجابي، وممكن كمان يتحول لعميل دائم.

رحلة العميل مش حاجة ثابتة، هي عبارة عن مراحل بيمر بيها، وكل مرحلة ليها نوع معين من البحث والمحتوى اللي العميل بيكون مهتم بيه. لو فهمت ده، هتعرف تهيئ موقعك بالطريقة الصح وتكسب ثقة المستخدمين وكمان محركات البحث.

المرحلة الأولى: الوعي – Awareness Stage في المرحلة دي، العميل بيكون لسه مش عارف أي حاجة عنك، هو بس عنده مشكلة أو استفسار وبيحاول يدور على إجابة. هنا البحث بيكون تعليمي أكتر، زي مثلًا:

“إزاي أختار شاشة إعلانات مناسبة لمتجري؟”

“إيه الفرق بين أنواع شاشات الإعلانات الرقمية؟”

“أفضل طرق لجذب الزبائن لمتجري؟”

في الحالة دي، الشخص مش بيدور على منتج معين، لكنه بيدور على معلومات تساعده يفهم أكتر عن المجال. ولو قدرت توفرله المحتوى المناسب هنا، هتبني ثقة كبيرة بينك وبينه، وهتبدأ تعرفه على البراند بتاعك بطريقة غير مباشرة.

عشان تستهدف العميل في المرحلة دي، لازم تركز على الكلمات المفتاحية اللي بتعبر عن نية البحث التعليمي. يعني لازم تستهدف كلمات زي “ما هو”، “إزاي”، “أفضل طريقة”، “دليل شامل”.

كمان المحتوى اللي هتقدمه هنا لازم يكون تعليمي بحت، بدون أي محاولة مباشرة للبيع. يعني لو عندك شركة بتبيع شاشات إعلانات، تقدر تعمل مقالة زي “دليل شامل لاختيار أفضل شاشة إعلانات لمتجرك”، وتشرح فيها كل التفاصيل بدون ما تحاول تبيع المنتج بشكل مباشر.

لو دخلت على موقع زي “محمود قلقيلة”، هتلاقي إنهم بيكتبوا مقالات تعليمية بدون أي محاولة للبيع، لكن في نفس الوقت بيكسبوا ترافيك كبير جدًا بسبب استهدافهم للكلمات المفتاحية الصح.

المرحلة الثانية: التفكير – Consideration Stage في المرحلة دي، العميل بقى عنده فكرة عن المجال، وبقى عارف إن فيه حلول لمشكلته، لكنه لسه بيبحث عن أفضل اختيار. يعني بدل ما كان بيسأل “إزاي أختار شاشة إعلانات؟”، هيبدأ يسأل:

“أفضل أنواع شاشات الإعلانات لعام 2024”

“مقارنة بين شاشات LED وLCD”

“مميزات وعيوب الشاشات الرقمية للإعلانات”

هنا العميل بقى داخل أكتر في تفاصيل المنتجات، وبدأ يقارن بين الخيارات المتاحة. وده معناه إنه قريب من قرار الشراء، لكن لسه محتاج معلومات أكتر تساعده يحدد اختياره النهائي.

في المرحلة دي، لازم تبدأ تستهدف كلمات مفتاحية طويلة (Long-Tail Keywords)، زي “أفضل شاشة إعلانات لمتجر ملابس” أو “مقارنة بين شاشة سامسونج وشاشة LG للإعلانات”.

كمان المحتوى هنا لازم يكون تحليلي أكتر، يعني تكتب مقالات بتقارن بين المنتجات، وتوضح المميزات والعيوب لكل اختيار. ممكن كمان تستخدم الجداول والتصنيفات عشان تسهل على العميل اتخاذ القرار.

موقع “تشوز شوز” لما بيعرضوا المنتجات، بيضيفوا مقارنات ومراجعات تفصيلية، وده بيساعد المشتري في مرحلة التفكير قبل ما يقرر يشتري المنتج.

المرحلة الثالثة: القرار – Decision Stage دلوقتي العميل قرر إنه هيشتري، لكنه عايز يتأكد إنه بياخد القرار الصح. البحث في المرحلة دي بيكون مباشر جدًا، زي:

“اشتري شاشة إعلانات سامسونج 50 بوصة”

“أفضل سعر لشاشة إعلانات رقمية في مصر”

“طلب شاشة إعلانات LED أونلاين”

هنا العميل مش بيدور على معلومات، هو بيدور على منتج بعينه، وعنده نية واضحة للشراء.

في المرحلة دي، لازم تركّز على تحسين صفحات المنتجات والـ Landing Pages، وتستخدم كلمات زي “اشتري”، “احصل على”، “أفضل سعر”.

كمان لازم تكون صفحة المنتج نفسها متوافقة مع معايير SEO، يعني يكون فيها وصف دقيق، وصور بجودة عالية، ومراجعات من العملاء، وزر واضح للشراء.

موقع “اندولا”، لو لاحظت، هتلاقي صفحات المنتجات عندهم مليانة بمعلومات تفصيلية، وده بيخلي العميل يحس بالثقة وياخد قرار الشراء بسهولة.

أغلب الشركات بتشتغل على الـ SEO بشكل عشوائي، وبتحاول تجيب ترافيك وخلاص، لكن من غير ما تفكر العميل ده في أي مرحلة من رحلة الشراء.

لكن لو قدرت تفهم الرحلة دي، هتعرف بالظبط إزاي توجه العميل من مرحلة لمرحلة، وإزاي تقدم له المحتوى المناسب في الوقت المناسب.

مرحلة الوعي: موقع “موضوع” بيقدم مقالات تعليمية بتستهدف الأسئلة العامة، وده بيجيب له ملايين الزيارات.

مرحلة التفكير: موقع “كان بكام” بيقدم مقارنات ومراجعات تفصيلية، وده بيساعد العملاء اللي بيفكروا في الشراء.

مرحلة القرار: مواقع زي “أمازون” بتركز على تحسين صفحات المنتجات عشان تسهّل عملية الشراء

الـ SEO مش مجرد اختيار كلمات مفتاحية والسلام. هو جزء من استراتيجية متكاملة لازم تكون ماشية مع رحلة العميل.

لو قدرت تستهدف كل مرحلة بالطريقة الصح، مش بس هتحصل على ترافيك عالي، لكن كمان هتحصل على عملاء مستهدفين وجاهزين للشراء.

ابدأ بفهم رحلة العميل، وقدم له المحتوى المناسب في كل مرحلة، وهتشوف الفرق في أداء موقعك ومبيعاتك بشكل واضح.