تخيل إنك فاتح محل في شارع زحمة جدًا، بس مفيش يافطة على المحل، ومفيش حد عارفه غير اللي عدى بالصدفة وقرر يخش يسأل. هل تتوقع إن المحل ده يحقق مبيعات كبيرة؟ أكيد لأ. لكن لو علقت يافطة واضحة، وبدأت تنور المحل، وتحط لافتات في الشوارع القريبة تدل الناس عليك، أكيد هيبدأ يجيلك زباين أكتر.

نفس الفكرة بالضبط مع SEO أو “تحسين محركات البحث”. ده ببساطة مجموعة من الاستراتيجيات اللي بتساعد موقعك يظهر في نتائج البحث لما الناس تدور على حاجة ليها علاقة بالمحتوى اللي بتقدمه. بمعنى تاني، SEO هو اللي بيخلي موقعك “موجود” على الإنترنت، مش مجرد موقع محدش شايفه.

محركات البحث زي Google هدفها الأساسي إنها توصل المستخدم لأفضل إجابة على سؤاله بأسرع طريقة ممكنة. فلو موقعك متظبط كويس، ومحركات البحث “فهمته” بشكل صحيح، فرصتك إنك تظهر في أول النتائج هتزيد، وده معناه زيارات أكتر، فرص بيع أكتر، ومصداقية أكبر عند الناس.

تخيل إنك بتدور على “أفضل أماكن الفسح في القاهرة”. أكيد أول موقع يظهر لك في البحث هيكون عنده فرصة أكبر إنك تدخله بدل ما تفضل تقلب في الصفحات التانية والتالتة. وده بالظبط اللي بيخلي SEO مهم لأي حد عنده موقع وعاوز يوصل لعدد أكبر من الناس.

لما تيجي تشتغل على تحسين موقعك، هتلاقي إن الشغل بيتقسم لحاجتين رئيسيتين: On-page SEO و Off-page SEO. كل واحد فيهم ليه دور مهم، ولو ركزت على واحد بس وسِبت التاني، النتايج مش هتبقى مثالية.

On-page SEO 

ده الجزء اللي بتتحكم فيه بالكامل من خلال موقعك. يعني أي حاجة تقدر تعدلها بنفسك عشان تحسن ظهورك في محركات البحث. وده بيشمل حاجات زي:

• اختيار الكلمات المفتاحية الصح: لازم تحدد إيه الكلمات اللي المستخدمين بيدوروا عليها وتحطها في المحتوى بطريقة طبيعية. مثلا لو عندك موقع بيوفر Mentors أونلاين، لازم تستخدم كلمات زي “أفضل SEO Mentor أونلاين”، “تعلم البرمجة مجانًا” وهكذا.
• تحسين Titles وMeta Descriptions: العنوان والوصف هما أول حاجة بتظهر في نتائج البحث، ولو كانوا جذابين، الناس هتضغط عليهم بنسبة أكبر.
• تنسيق المحتوى: استخدام عناوين فرعية (H1, H2, H3) وتنظيم المقال بحيث يكون سهل القراءة، ده بيساعد محركات البحث تفهم المحتوى بسرعة.
• الـ Internal Links: يعني تربط صفحات موقعك ببعض، وده بيساعد المستخدمين ومحركات البحث يتنقلوا بسهولة.
• سرعة الموقع وتجربة المستخدم: كل ما كان موقعك سريع وأسهل في الاستخدام، كل ما كانت فرصتك في الترتيب أعلى.

من الأمثلة اللي بتطبق الـ On-page SEO بشكل ممتاز موقع موضوع، لو بصيت على مقالاتهم هتلاقيها منظمة كويس جدًا، وكل عنوان فرعي فيه الكلمة المفتاحية المطلوبة، وكمان سرعة الموقع ممتازة.

Off-page SEO

ده الجزء اللي مش في إيدك بالكامل، لكنه مهم جدًا في تحسين ترتيب موقعك. وبيشمل حاجات زي:

• الـ Backlinks: لما مواقع تانية تعمل رابط لموقعك، ده بيعتبر إشارة لمحركات البحث إن موقعك موثوق. لكن لازم الروابط دي تكون من مواقع قوية وليها علاقة بمجالك.
• السوشيال ميديا والإشارات Social Signals: لو المحتوى بتاعك بيتنشر وبيتفاعل عليه الناس على مواقع زي Facebook و Twitter و Instagram، ده ممكن يساعد في تحسين ترتيبك في البحث.
• الـ Guest Blogging: إنك تكتب مقالات في مواقع تانية مقابل إنهم يحطوا رابط لموقعك، وده بيساعد في زيادة عدد الزوار لموقعك.

موقع سوق.كوم قبل ما يتحول لـ Amazon Egypt كان بيعتمد على Off-page SEO بشكل كبير، وكان بيشتغل على بناء روابط من مواقع مراجعات المنتجات والمواقع التقنية اللي بتتكلم عن التسوق الإلكتروني.

محركات البحث هدفها الأساسي إنها تخلي المستخدم يلاقي اللي بيدور عليه بسرعة، عشان يفضل يستخدمها، وده معناه إن الشركات هتفضل تدفع فلوس عشان تعلن عندها. فلو محرك البحث ما قدمش نتائج مفيدة، المستخدمين هيبدأوا يدوروا على بدائل، وده معناه خسارة فلوس للإعلانات.

SERP: الصفحة اللي بتظهر فيها نتائج البحث

لما تعمل بحث على Google، الصفحة اللي بتظهر لك فيها النتائج اسمها Search Engine Results Page. الصفحة دي مش بس بتحتوي على النتائج العادية، لكن كمان بتضم الإعلانات، والصور، والفيديوهات، وأحيانا خريطة لو بتدور على مكان معين.

لو لسه جديد في المجال، أفضل حاجة تبدأ بيها إنك تتعلم الأساسيات وتطبقها على موقعك. في محتوي مجانى علي موقع Mahmoud Qolqala والمحتوي اللي بتقدمه Google Digital Garage، وMoz Academy.

SEO مش مجرد حاجة تعملها مرة وخلاص، لكنه عملية مستمرة. لازم تتابع التحديثات اللي بتحصل في محركات البحث، وتحلل أداء موقعك، وتشوف إيه اللي شغال وتطوره.

لو اشتغلت على SEO صح، موقعك هيكون زي المحل اللي في الشارع الزحمة بس عليه يافطة كبيرة، منورة، والناس عارفة هو فين وبيبيع إيه، وساعتها هتشوف فرق كبير في عدد الزوار والمبيعات.