زمان كان فيه شركة ناشئة اسمها “سمارت شوب” كانوا بيبيعوا منتجات إلكترونية، المشكلة كانت إنهم رغم الإعلانات القوية اللي عملوها، ماكانوش بيشوفوا الـ Growth اللي كانوا بيحلموا بيه، فريق التسويق قرر يبدأ يركز على تجربة المستخدم (UX) ويحسنها أول حاجة عملوها كانت إنهم جابوا مجموعة من الزوار العاديين وقعدوهم قدام الموقع، وطلبوا منهم يقلبوا ويشتروا حاجة.

اكتشفوا إن الزوار كانوا بيتلخبطوا بسبب تصميم الموقع اللي كان معقد، الصفحات كانت بتاخد وقت طويل عشان تحمل، والموقع ماكنش متوافق مع الموبايل. الزوار كانوا بيسيبوا الموقع بسرعة قبل ما يشتروا أي حاجة.

استخدام الأدوات والاستراتيجيات اللي هنتكلم عنها في المقال ده هيساعدك تحقق الـ Growth اللي بتسعى ليه، وزى ما اتكلمنا قبل كدة الـ Growth Marketing هو عملية متكاملة مش بتعتمد على جانب واحد بس من التسويق، وواحدة من أهم العوامل اللي بتأثر على نجاح الـ Growth هي تجربة المستخدم (UX).فـ خلينا بردوا ناخدهم خطوات من الأول:

ايه هي تجربة المستخدم (UX)؟

تخيل إنك دخلت محل ولقيت كل حاجة مترتبة ومكانها مظبوط والموظفين بيساعدوك بابتسامة وكل اللي انت محتاجه موجود بسهولة ده بالضبط مفهوم تجربة المستخدم، في عالم التطبيقات والمواقع UX هي الحكاية اللي بتفرق بين تطبيق يريحك وتطبيق يخليك تقفل الصفحة بدري الفكرة إنك تفهم المستخدم تسهل عليه الرحلة وتحسسه إنه فاهم اللي بيعمله من غير تعقيد UX مش مجرد تصميم حلو دي منظومة كاملة بتجمع بين الشكل الجميل والوظيفة السهلة عشان تقدم تجربة تخلي الناس ترجعلك مرة ورا التانية.

ليه تجربة المستخدم مهمة في الـ Growth Marketing؟

• زيادة التفاعل: تجربة مستخدم كويسة بتشجع الزوار على التفاعل مع الموقع أو الأبلكيشن، سواء كان من خلال زيارة الصفحات أو الشراء.
• تحسين الزيارات: لما يكون المستخدم قادر يوصل للي هو عايزه بسرعة ومن غير تعقيدات، ده بيزيد من فرص تحويل الزوار لعملاء.
• الاحتفاظ بالعملاء: الزوار اللي بيلاقوا تجربتهم على الموقع أو الأبلكيشن مريحة وممتعة، بيبقوا عندهم استعداد للرجوع مرة تانية.

استراتيجيات تحسين تجربة المستخدم

• تبسيط التصميم: استخدم تصميم بسيط وسهل الفهم يساعد الزوار على التنقل بسهولة.
• سرعة التحميل: اتأكد إن الموقع أو الأبلكيشن بيحمل بسرعة عشان الزوار ميفقدوش صبرهم.
• مناسب للموبايل: لازم يكون الموقع أو الأبلكيشن متوافق مع جميع الأجهزة، خصوصًا الموبايل.
• التفاعل مع الزوار : استخدم أدوات زي الرسائل والتعليقات عشان تعرف رأي الزوار في تجربتهم وتحسّن منها.
• أمازون: موقع أمازون بيقدم تجربة مستخدم ممتازة من خلال تصميم بسيط وسهل، وسرعة في التحميل، وتوصيات مخصصة لكل مستخدم بناءً على تاريخه في الشراء.
• نتفليكس: نتفليكس بيستخدم تجربة سهلة ومقترحات، وده بيساعد في الاحتفاظ بالعملاء وتحفيزهم على الاستمرار في الاشتراك.

أدوات لتحليل تجربة المستخدم

وهنا قرروا يبدأ باستخدام أدوات لتحليل تجربة المستخدم. استخدموا:

• هوتجار (Hotjar): عشان يشوفوا خرايط لحركة الزوار على الموقع، ويعرفوا الأماكن اللي الزوار بيعلقوا فيها. 
• جوجل أناليتكس (Google Analytics): عشان يحللوا سلوك الزوار ويحددوا الصفحات اللي بتسبب مشاكل.

وهنا بدأوا يشتغلوا علي:

• تبسيط التصميم: فريق التصميم اشتغل على تبسيط واجهة المستخدم، خلوها بسيطة وسهلة الفهم.
• تسريع التحميل: المطورين اشتغلوا على تحسين سرعة تحميل الموقع باستخدام أدوات زي جي تي متريكس (GTmetrix) لتحليل سرعة الموقع.
• التوافق مع الموبايل: تأكدوا إن الموقع بيشتغل بكفاءة على كل الأجهزة، خصوصًا الموبايل. 

بعد تحسين تجربة المستخدم، “سمارت شوب” لاحظوا تغير كبير:

• زيادة التفاعل: الزوار بقوا بيتفاعلوا مع الموقع أكتر، وبيقضوا وقت أطول.
• ارتفاع الزيارات والشراء: عدد الناس اللي بيشتروا فعلاً زاد بشكل ملحوظ.
• الاحتفاظ بالعملاء: العملاء بقوا بيرجعوا يشتروا تاني بسبب التجربة المريحة.

تجربة المستخدم (UX) مش بس حاجة جميلة تضيفها لموقعك أو الأبلكيشن، دي عامل أساسي في نجاح الأبلكيشن أو الموقع.

تحسين تجربة المستخدم بيزود التفاعل، بيرفع معدلات الزيارات، وبيخلي العملاء يرجعوا مرة تانية.