لو جوجل قال لك ان Landing Page بتاعتك مستواها قليل، تعمل ايه؟

لو عندك إعلان مدفوع على Google Ads وجوجل بعت لك إشعار إن مستوى الLanding Page بتاعتك ضعيف، يبقى لازم تاخد الموضوع بجدية، لأن الصفحة الضعيفة معناها إنك هتدفع فلوس أكتر وهتوصل لعدد أقل من العملاء.

جوجل بيقيم الصفحات بناءً على معايير محددة، ولو الصفحة بتاعتك مش مطابقة للمواصفات دي، ده هيأثر على الQuality Score وبالتالي إعلاناتك هتظهر بشكل أقل وهتدفع تكلفة أكبر لكل نقرة. لو مستوى صفحتك ضعيف، جوجل هيقلل من فرص ظهور إعلانك في أعلى نتائج البحث، وممكن في بعض الحالات يمنع إعلاناتك من الظهور خالص.

إزاي تعرف إن الـ Landing Page بتاعتك ضعيفة؟

1. جوجل بيبعت لك إشعار في Google Ads إن مستوى صفحتك ضعيف.
2. معدل الـ Conversion Rate على الصفحة ضعيف جدًا.
3. معدل الـ Bounce Rate عالي جدًا، يعني الناس بتدخل الصفحة وبتخرج بسرعة.
4. تكلفة الإعلانات عالية مقارنة بعدد العملاء اللي بتوصل لهم.

جوجل بيركز على 3 عناصر أساسية لتحسين الLanding Page

1. Relevant and Original Content – محتوى مناسب وأصلي.
2. Transparency – الشفافية والمصداقية.
3. Ease of Navigation – سهولة التنقل والاستخدام.

إزاي تحسن الLanding Page؟

1. خلي الصفحة مرتبطة بالإعلان

لازم الشخص اللي بيضغط على الإعلان يلاقي نفس المحتوى اللي كان متوقعه بناءً على الإعلان. يعني لو بتعلن عن “ملابس أطفال”، يبقى الصفحة اللي بيتم توجيه الناس ليها تكون عن “ملابس أطفال” فقط، مش قسم الملابس بالكامل اللي فيه ملابس رجالي وحريمي وأطفالي.

جوجل بيقيم الصفحة بناءً على مدى التناسق بينها وبين الإعلان والكلمات المفتاحية اللي استخدمتها في Google Ads.

2. قلل عدد الروابط الخارجية في الصفحة

جوجل بينصح إن عدد الروابط في الLanding Page مايزيدش عن 3 روابط، لأن كتر الروابط بيخلي الزائر يشتت ويخرج من الصفحة بسرعة، وده بيأثر بالسلب على معدل التحويل.

3. خلي الصفحة سهلة ومترتبة

الزائر لما يدخل الصفحة لازم يلاقي المعلومات اللي محتاجها بسهولة. الترتيب العشوائي للصفحة أو وجود عناصر مش واضحة بيخلي الزائر يمل ويخرج.

• خلي التصميم بسيط ونظيف.
• استخدم عناوين واضحة ومرتبة.
• استخدم تقسيمات واضحة للمحتوى زى Bullet Points.
• خليك مركز على Call to Action واحد زي “اشترِ الآن” أو “سجل مجانًا”.

4. استخدم كلمات واضحة وصريحة تشجع على اتخاذ قرار

المحتوى لازم يكون سهل وبسيط ويشجع الزائر إنه ياخد Action سريع. حاول دايمًا تفكر من منظور العميل، واسأل نفسك: هو العميل داخل الصفحة دي علشان يعمل ايه؟ وبناءً عليه، خلي الرسالة واضحة وسهلة التنفيذ.

أمثلة على Call to Action فعال:

• “احصل على خصم 50% الآن!”
• “سجل مجانًا خلال 30 ثانية!”
• “اطلب المنتج الآن واستمتع بشحن مجاني!”

5. استخدم صور بجودة عالية

الصور عنصر أساسي في أي Landing Page ناجحة. لازم الصور تكون

• بجودة عالية.
• متوافقة مع المحتوى المكتوب.
• بتساعد الزائر يفهم المنتج أو الخدمة.

جوجل بيقيم الصفحة بناءً على جودة المحتوى، ولو الصور ضعيفة أو مش مناسبة، ده هيأثر بالسلب على ترتيب صفحتك.

6. استخدم عناوين قوية وجذابة

العنوان هو أول حاجة الزائر بيشوفها، فلازم يكون جذاب ويشد انتباهه.

نصائح لكتابة عنوان قوي

• يكون واضح وصريح.
• يعكس الفائدة اللي هيحصل عليها الزائر.
• يكون قصير وسهل القراءة.

مثال على عنوان قوي: “اشترِ أفضل ملابس أطفال بأرخص الأسعار مع توصيل مجاني!”

7. استخدم كلمات بسيطة ومختصرة

الـ Landing Page مش مكان للمقالات الطويلة، الهدف الأساسي هو البيع أو تحقيق Conversion معين، فخلي النصوص قصيرة ومركزة على الفائدة اللي هيحصل عليها الزائر.

8. جرب تبسيط أو تعقيد الصفحة بناءً على نوع العميل

لو معدل التحويل ضعيف، جرب تبسيط المحتوى أكتر بحيث يكون مباشر وسريع.

أما لو مشكلتك إن العملاء اللي بيوصلوا مش جادين، فممكن تعقد الصفحة بشكل بسيط بحيث إن الشخص اللي يكمل للنهاية يكون فعلًا مهتم بالخدمة أو المنتج، وبالتالي تكون نسبة العملاء الجادين أعلى.

9. أضف وسائل التواصل الاجتماعي والمراجعات

عشان تكسب ثقة الزائر، لازم تضيف أي حاجة تثبت مصداقيتك، زي

• روابط السوشيال ميديا الخاصة بك.
• مراجعات العملاء السابقين.
• شهادات الاعتماد والتوصيات زي شهادات الأيزو لو بتبيع منتج، أو شهادات طبية لو انت دكتور.

10. تأكد إن سرعة الموقع سريعة

سرعة تحميل الصفحة عامل أساسي في تقييم Google، ولو الموقع بطيء، معدل الارتداد هيزيد، وGoogle هيتعامل مع الصفحة على إنها غير مناسبة.

نصائح لتحسين سرعة الموقع

• استخدم صور مضغوطة.
• قلل استخدام الأكواد الثقيلة في الصفحة.
• استخدم استضافة سريعة.
• جرب أداة Google Page Speed Insights وشوف المشاكل اللي ممكن تحسنها.

تحسين الـ Landing Page مش رفاهية، ده شيء أساسي لو عايز تنجح في التسويق عبر Google Ads. لازم تكون الصفحة واضحة، سريعة، ومتوافقة مع الإعلان والكلمات المفتاحية اللي بتستخدمها. جرب تطبق النصائح اللي ذكرناها وشوف الفرق في أداء إعلاناتك وتكلفة النقرة.

ابدأ دلوقتي وحسن الـ Landing Page بتاعتك علشان تحقق أفضل النتائج من حملاتك الإعلانية.