دور الـ Media Buyer مش مجرد إنه يحدد ميزانية ويشغل الحملات وخلاص. شغلنا الأساسي هو المتابعة والتحليل المستمر، لأن نجاح الإعلانات مش بيتوقف على تشغيلها بس، لكن على إدارتها بشكل صحيح وتحسينها بناءً على البيانات اللي بتطلع منها. رغم إن الذكاء الاصطناعي (AI) بقى ليه دور كبير في إدارة الحملات، لكن لا غنى عن المتابعة البشرية والمراجعة الدورية للحسابات عشان نحقق أعلى عائد على الاستثمار (ROI).

عشان كده، الـ Media Buyer لازم يشتغل على خطة متابعة يومية، أسبوعية، وشهرية لكل الحسابات والحملات الإعلانية، ويستخدم الأدوات المناسبة اللي تساعده على تحليل البيانات واتخاذ قرارات صحيحة. في المقال ده، هنشرح بالتفصيل إزاي المفروض يكون الروتين الطبيعي لأي Media Buyer شغال على Google Ads.

 أولًا: الروتين اليومي للـ Media Buyer:

المتابعة اليومية للحملات الإعلانية بتضمن إن كل حاجة ماشية بالشكل الصحيح، وإن مفيش مشاكل غير متوقعة بتأثر على الأداء. ده غير إن التحليل المستمر للأداء اليومي بيساعد في اكتشاف أي مشكلة في وقتها قبل ما تأثر على الحملة بشكل كبير. 

إيه اللي لازم نراجعه يوميًا؟

• مراجعة الحملات الإعلانية الفعالة
  كل يوم الصبح، لازم تدخل على حساب Google Ads وتراجع الحملات اللي شغالة.
  تأكد إن مفيش مشاكل تقنية أو أعطال في ظهور الإعلانات.
  راجع إحصائيات الأداء الأساسية زي عدد النقرات (Clicks)، عدد الظهور (Impressions)، ونسبة النقر إلى الظهور (CTR).
• مراجعة الميزانية والصرف
  راجع الميزانية اللي اتصرفت خلال اليوم السابق.
  قارن بين المبلغ المصروف والنتائج اللي تم تحقيقها.
  تأكد إن الميزانية متوزعة بشكل صحيح على الحملات المختلفة.
• تحليل تكلفة العميل الفعلي (Customer Acquisition Cost – CAC)
  احسب تكلفة العميل الفعلي اللي اشترى أو تعاقد نتيجة الإعلان.
  قارن التكلفة دي بأهداف الحملة عشان تعرف إذا كانت الحملة مربحة ولا محتاجة تعديل.
• مراجعة إشعارات Google Ads
  Google Ads دايمًا بيقدم مقترحات للتحسين، بعضها مفيد وبعضها مش مناسب لكل بيزنس.
  لازم تراجع المقترحات يوميًا وتشوف إذا كان فيه أي حاجة ممكن تطبقها لتحسين الأداء.
• مراقبة أي تغييرات مفاجئة في الأداء
  لو لقيت إن حملة معينة انخفض أداؤها بشكل مفاجئ، لازم تحلل الأسباب فورًا.
  راجع التعديلات الأخيرة، المنافسة، أو أي عوامل تانية ممكن تكون أثرت على النتائج.

 ثانيًا: الروتين الأسبوعي للـ Media Buyer

المراجعة الأسبوعية بتكون أعمق من المراجعة اليومية، وبيكون الهدف منها هو تحليل الاتجاهات العامة للحملات، مش بس النتائج اللحظية.

إيه اللي لازم نراجعه أسبوعيًا؟

• تحليل الحساب الإعلاني بالكامل
  مراجعة مستوى الجودة للحساب ومدى التزامه بسياسات Google.
  التأكد من إن الحساب مفيهوش أي مشاكل تقنية أو أخطاء في الإعلانات.
• مراجعة مقترحات Google لتحسين الأداء
  بعض المقترحات اللي بتظهر في Google Ads ممكن تكون فعالة، زي تحسين الـ Keywords أو تعديل الميزانية.
  ضروري تراجع المقترحات دي بشكل أسبوعي وتقرر إيه اللي ممكن تطبقه.
• تحليل صرف الميزانية
  قارن بين الميزانية المصروفة والنتائج اللي تم تحقيقها.
  شوف إذا كان فيه حملات بتستهلك ميزانية كبيرة بدون تحقيق نتائج.
  تحليل نسبة الزيارات مقارنة بنسبة الشراء أو الحجز
  عدد الزيارات مهم، لكن الأهم هو التحويلات (Conversions).
  لازم تعرف نسبة العملاء اللي اتخذوا إجراء معين بعد ما دخلوا على الإعلان.
• تقرير عن الكلمات البحثية الأكثر استخدامًا
  راجع الـ Search Terms وشوف إيه الكلمات اللي جابت أفضل نتائج.
  استبعد الكلمات اللي مالهاش علاقة بالبيزنس (Negative Keywords).
• تحليل أفضل الـ Placements
  راجع الأماكن اللي ظهرت فيها الإعلانات، سواء على مواقع، تطبيقات، أو فيديوهات يوتيوب.
  استبعد الأماكن اللي مش بتجيب نتائج كويسة.
• تحليل أداء الإعلانات على الأجهزة المختلفة
  شوف إذا كان الإعلان بيجيب نتائج أفضل على الموبايل، الديسكتوب، أو التابلت.
  لو لقيت إن جهاز معين بيحقق نتائج ضعيفة، ممكن تقلل الميزانية المخصصة له.
• تحليل تكلفة النقرة (CPC) على مستوى كل مجموعة إعلانية
  لازم تعرف تكلفة النقرة لكل حملة، وهل التكلفة دي مناسبة للعائد اللي بتحققه ولا لأ.
  بناءً على الأداء، ممكن تزود أو تقلل الميزانية لبعض الدول أو المناطق الجغرافية. 

ثالثًا: الروتين الشهري للـ Media Buyer

المراجعة الشهرية بتكون أعمق وأشمل، وبتساعد في اتخاذ قرارات استراتيجية للحملات.

 إيه اللي لازم نراجعه شهريًا؟

•  تحليل مؤشرات الأداء الأساسية (KPIs)
  مقارنة الأداء الشهري بالحملات السابقة.
  مراجعة الأهداف اللي اتحققت وتحديد إذا كان فيه أي تغيير مطلوب.
• تحليل كل منصة على حدة
  لو بتستخدم أكثر من قناة تسويقية، لازم تراجع أداء كل واحدة لوحدها.
• قارن بين أداء Google Search، Google Display، وYouTube Ads.
• تحليل معدل المبيعات وصافي الربح
  لازم تعرف نسبة الأرباح مقارنة بالمصروفات.
  احسب العائد على الاستثمار (ROI) وشوف إذا كان فيه حملات بتحتاج تعديل.
• مقارنة الأداء الشهري مع باقي السنة
  تحليل النمو (Growth) على مدار الشهور.
  معرفة إذا كان الأداء بيتحسن مع الوقت ولا لأ.
• تحليل جودة الإعلانات
  مراجعة الإعلانات اللي جابت أفضل نتائج، ومعرفة سبب نجاحها.
  مقارنة الإعلانات ببعضها لتحديد أي صياغة أو تصميم كان الأكثر فاعلية.
• تحليل أفضل محتوى إعلاني
  تحديد أي محتوى كان الأكثر جذبًا للجمهور.
  معرفة أي نوع من الصور أو الفيديوهات كان أكثر تأثيرًا.
• إعداد تقرير شامل عن أداء البيزنس
  تحليل شامل لكل البيانات، وإعداد تقرير واضح عن التحديات والتحسينات المطلوبة.

أهم الأدوات اللي بنستخدمها

عشان نقدر نعمل التحليلات دي بكفاءة، لازم نستخدم أدوات متخصصة تساعدنا في جمع وتحليل البيانات:

• Google Tag Manager (GTM): لتتبع الأحداث داخل الموقع.
•  Google Analytics 4 (GA4): لتحليل بيانات الزوار.
• Looker Studio: لإنشاء تقارير متقدمة.
• Hotjar: لفهم سلوك المستخدمين على الموقع.